மட்டக்களப்பு மாவட்ட விளையாட்டுப் பிரிவும் கிழக்கு மாகாண விளையாட்டுத் திணைக்களமும் இணைந்து மட்டக்களப்பு மாவட்டத்திலுள்ள பிரதேச செயலகங்களுக்கிடையில் நடாத்திய விளையாட்டுப் போட்டியின் இறுதி நாள் நிகழ்வு 16.06.2024 அன்று மட்டக்களப்பு வெபர் விளையாட்டு மைதானத்தில் இடம்பெற்றது.
மட்டக்களப்பு மாவட்ட மேலதிக அரசாங்க அதிபர் (காணி) நவரூபரஞ்ஜனி முகுந்தன் தலைமையில் கிழக்கு மாகாண சிரேஸ்ட விளையாட்டு உத்தியோகத்தர் வீ.ஈஸ்வரனின் ஏற்பாட்டில் நடைபெற்ற இந்நிகழ்வில், மட்டக்களப்பு மாவட்ட அரசாங்க அதிபர் ஜஸ்டீனா முரளீதரன் பிரதம அதிதியாகவும் மாவட்ட மேலதிக அரசாங்க அதிபர் சுதர்ஷினி ஸ்ரீகாந்த், கிழக்கு மாகாண விளையாட்டுத் திணைக்களப் பணிப்பாளர் யூ.சிவராசா மற்றும் கிழக்கு மாகாணக் கல்விப் பணிப்பாளர் சுஜாத்தா குலேந்திரகுமார், 243 வது இராணுவ படைப்பிரிவின் பிரிக்கேட் கொமாண்டர் சந்திம குமார சிங்க ஆகியோர் சிறப்பு அதிதிகளாகவும் மட்டக்களப்பு மாவட்டத்தின் சகல பிரதேச செயலகங்களில் பிரதேச செயலாளர்களும் அழைப்பு அதிதிகளாகவும் கலந்து கொண்டு சிறப்பித்துள்ளதுடன், வெற்றியீட்டிய வீரர்களுக்கான பரிசல்களையும் வழங்கி வைத்தனர்.
இவ் விளையாட்டு நிகழ்வில் மட்டக்களப்பு மண்முனை வடக்குப் பிரதேச செயலகம் முதல் இடத்தைப் பெற்றுக் கொண்டதுடன், இவர்களுக்கான வெற்றிக் கிண்ணம் மற்றும் சான்றிதழ்கள் பிரதம அதிதியினால் வழங்கி வைக்கப்பட்டது.
மேலும் உத்தியோகத்தர்களுக்காக தொப்பி மாற்றும் நிகழ்வு, கயிறு இழுத்தல் போட்டி என்பனவும் இடம்பெற்றமை குறிப்பிடத்தக்கது.
இச் செய்தியினை ஏனையவர்களுக்கும் பகிர…👇👇
