ஜனாதிபதி நிதியத்தின் மூலம் மத்திய மாகாண லொத்தர் விற்பனையாளர்களின் பிள்ளைகளுக்கு புலமைப்பரிசில் வழங்கும் நிகழ்வு!

குறைந்த வருமானம் பெறும் லொத்தர் விற்பனையாளர்களின் பிள்ளைகளுக்காக ஜனாதிபதி நிதியத்தினால் வழங்கப்படும் கல்விப் புலமைப்பரிசில் திட்டத்தின் மத்திய மாகாண நிகழ்ச்சி, சபாநாயகர் வைத்தியர் ஜகத் விக்ரமரத்ன தலைமையில் 27.09.2026 அன்று கண்டி மாவட்ட செயலகத்தில் நடைபெற்றது.

லொத்தர் சீட்டு விற்பனை மூலம் ஜனாதிபதி நிதியத்திற்கு கிடைக்கும் நிதிப் பங்களிப்பைப் பாராட்டி, லொத்தர் விற்பனையாளர்களுக்கு நன்றி செலுத்தும் வகையில் இந்த நிகழ்ச்சித்திட்டம் செயல்படுத்தப்பட்டுள்ளதுடன், நாட்டின் அனைத்து மாகாணங்களையும் உள்ளடக்கும் வகையில் முதலாம் தரம் முதல் உயர்தரம் வரை பாடசாலைக் கல்வி பயிலும் பிள்ளைகளுக்காக இப்புலமைப்பரிசில் திட்டம் செயல்படுத்தப்படுகிறது.

மத்திய மாகாணத்தைச் சேர்ந்த லொத்தர் விற்பனையாளர்களின் பிள்ளைகளுக்கு நேற்றைய தினம் புலமைப்பரிசில்கள் வழங்கப்பட்டன.

மேலும், மஹையாவ பூர்ணவத்த (மேற்கு) கிராம உத்தியோகத்தர் பிரிவைச் சேர்ந்த மாணவ, மாணவிகளுக்கான கல்விப் புலமைப்பரிசில் வழங்கும் நிகழ்வும் இதன்போது நடைபெற்றது.

இங்கு 106 மாணவர்கள் புலமைப்பரிசில் மற்றும் கல்வி உதவிகளை பெற்றுக்கொண்டனர்.

நிகழ்வில் உரையாற்றிய சபாநாயகர் வைத்தியர் ஜகத் விக்ரமரத்ன,

தேசத்தைக் கட்டியெழுப்பும் போராட்டத்திற்கு லொத்தர் விற்பனையாளர்கள் வழங்கும் முழுமையான பங்களிப்பைப் பாராட்டும் ஒரு வாய்ப்பாகவே இது அமைகிறது எனக் குறிப்பிட்டார்.

இதன்போது மேலும் கருத்துத் தெரிவித்த சபாநாயகர் வைத்தியர் ஜகத் விக்ரமரத்ன:

2025 ஆம் ஆண்டு முதல் ஜனாதிபதி நிதியம் இந்த நாட்டு மக்களுக்காகவே ஒதுக்கப்பட்ட ஒரு நிதியமாக பாரிய சேவையில் ஈடுபட்டு வருகிறது.

2026 ஆம் ஆண்டில் இதுவரை 6,115 மில்லியன் ரூபா ஜனாதிபதி நிதியத்தினால் இந்த நிகழ்ச்சித்திட்டங்களுக்காகச் செலவிடப்பட்டுள்ளது.

சிகிச்சைகளுக்காக 856 மில்லியன் ரூபாவும், சுயதொழில் மற்றும் ஆதரவற்ற குடும்பங்களுக்காகவும், 41 மதத்தலங்களுக்கும், கலாசார பெரஹராக்களை நடத்துவதற்கும் நிதி வழங்கப்பட்டுள்ளது. கடந்த ஆண்டு ஏற்பட்ட ‘டித்வா’ சூறாவளியினால் பாதிக்கப்பட்ட 206,001 பாடசாலை மாணவர்களுக்கு, ஒரு பிள்ளைக்கு 10,000 ரூபா வீதம் 2,060 மில்லியன் ரூபாய் வழங்கப்பட்டது.

2026 ஆம் ஆண்டில் மஹபொல புலமைப்பரிசில்களுக்காக மாத்திரம் 2,666 மில்லியன் ரூபா வழங்கப்பட்டுள்ளது. 2023/2024 க.பொ.த உயர்தரப் பரீட்சையில் 01 ஆம் இடம் முதல் 10 ஆம் இடம் வரை சிறந்த பேறுகளைப் பெற்ற மாணவர்களுக்கு வழங்கப்பட்ட புலமைப்பரிசில், 2025 ஆம் ஆண்டில் 01 ஆம் இடம் முதல் 20 ஆம் இடம் வரை இரட்டிப்பாக உயர்த்தப்பட்டுள்ளது.

சிந்தித்துப் பாருங்கள், இவ்வளவு அதிக தொகைகள் எங்கிருந்து வழங்கப்படுகிறது என்று? இந்த நிதியை வழங்குவது லொத்தர் விற்பனை செய்யும், இத்தொழிலில் ஈடுபட்டுள்ள 20,000 பேராகிய நீங்கள்தான். கணக்கிட்டுப் பார்த்தால், நீங்கள் ஒரு வருடத்திற்கு 30,000 மில்லியன் ரூபாவுக்கும் அதிகமான தொகையை அரசாங்கத்திற்கும், நாட்டின் அபிவிருத்திக்கும் வழங்குகிறீர்கள்.

தேசிய லொத்தர் சபையிலிருந்து அரச பொது நிதியத்திற்கு ஆண்டுதோறும் 6,000 மில்லியன் ரூபாவும், உள்நாட்டு இறைவரித் திணைக்களத்திற்கு 1,500 மில்லியன் ரூபாவும், ரணவிரு நிதியம், சிறுநீரக நிதியம், சுகாதார அபிவிருத்தி, சமூக சேவை மற்றும் விவசாய நிதியங்களுக்கு மேலும் 600 மில்லியன் ரூபாவும் வழங்கப்படுகிறது.

இந்த அனைத்துப் பணத்தையும் வழங்குவது லொத்தர் விற்பனை செய்யும் 20,000 பேராகிய நீங்கள்தான். நீங்கள் சாதாரணமானவர்கள் அல்ல. இராணுவம், சுகாதாரத்துறை உத்தியோகத்தர்கள், வெளிநாட்டிலிருந்து பணம் அனுப்புபவர்களைப் போலவே நீங்களும் தேசத்திற்கு ஒரு பாரிய சேவையைச் செய்யும் அமைதியான வீரர்கள். அதற்காக நான் நன்றியுடையவனாக இருக்கிறேன். தேசத்தைக் கட்டியெழுப்பும் போராட்டத்திற்கு நீங்கள் வழங்கும் முழுமையான பங்களிப்பிற்கு எனது நன்றியைத் தெரிவித்துக் கொள்கிறேன்.

சுகாதார பிரதி அமைச்சர் வைத்தியர் ஹன்சக விஜேமுனி

நீங்கள் கல்வியின் அறிவைத் தேடிச் செல்ல வேண்டும். இன்றைய காலகட்டத்தில் அறிவு என்பது மிகவும் சவாலான ஒன்றாகும். அறிவு என்பது நாம் படிக்கும் புத்தகங்களுக்கு அப்பால் உள்ளது. எனவே, நீங்கள் அப்படிப்பட்ட அறிவைத் தேடிச் செல்லும் ஒரு குழுவாக மாற வேண்டும் என நாம் விரும்புகிறோம். அந்த அறிவைப் போலவே நீங்கள் பெறும் திறன்களுடன் ஒழுக்கத்தையும் வளர்த்துக் கொள்ள வேண்டும். ஒழுக்கமில்லாத திறமையால் நாட்டிற்கு எந்தப் பயனும் இல்லை.

உலகின் மிகவும் முன்னேறிய ஒரு அரசை நோக்கிச் செல்லும் பயணத்தில் ஒரு மாணவராக நீங்கள் பயணித்துக் கொண்டிருக்கிறீர்கள். எனவே, இலங்கையை அந்த மிக வளர்ந்த அரசாக மாற்றுவதற்கான பொறுப்பில் பெரும் பங்கு உங்களுக்கு உள்ளது.

அபிவிருத்தி லொத்தர் சபையும், அதே போல் தேசிய லொத்தர் சபையும் ஒரு முதலீட்டையே செய்கின்றன. அதே போன்று ஜனாதிபதி நிதியம் செய்வதும் ஒரு முதலீடாகும். நாம் நாட்டில் தொழிற்சாலைகளை அமைப்பதை விட, வீதிகளை அமைப்பதை விட, அல்லது நாட்டின் ஏனைய அபிவிருத்தி திட்டங்களை விட இது மிகப்பாரிய முதலீடு என்று கூற வேண்டும். எனவே, அந்த முதலீட்டின் பயன்களை நாம் பெறுவோம். மேலும், அந்தப் பயன்களை மீண்டும் நமது நாட்டிற்குத் திருப்பிக் கொடுப்போம்.

போக்குவரத்து மற்றும் நெடுஞ்சாலைகள் பிரதி அமைச்சர் வைத்தியர் பிரசன்ன குணசேன

நமது நேரியல் கல்வி முறையில், குறிப்பிட்ட எண்ணிக்கையிலான பிள்ளைகள் இடையிலேயே விடுபடுகிறார்கள். அவர்களிடம் ஏதோ ஒரு திறமை இருக்கிறது. ஆனால் அந்தத் திறமையை அளவிட அளவுகோல் இல்லை.

இவ்வாறு விடுபடுபவர்களுக்கு என்ன நடக்கிறது? இதனால்தான் தற்போதைய அரசாங்கம் புதிய கல்விச் சீர்திருத்தங்களை அறிமுகப்படுத்தியுள்ளது. முதலாம் வகுப்பிலிருந்து தொடங்கப்பட்ட இந்தக் கல்விச் சீர்திருத்தங்கள் மூலம் இத்தகைய திறமைகளைக் கொண்ட சிறுவர்கள் விடுபட மாட்டார்கள் என்று நாங்கள் நம்புகிறோம். ஏதோ ஒரு வழியில் சமூகத்திற்குப் பயன்படும் பிள்ளையை உருவாக்க முடியும் என்று நம்புகிறோம். 13 ஆண்டுகளுக்குப் பிறகு மேற்கொள்ளப்படும் கல்விச் சீர்திருத்தங்கள் மூலம் நாங்கள் அதனையே எதிர்பார்க்கின்றோம்.

நாம் எவ்வளவு வேண்டுமானாலும் பௌதிக அபிவிருத்திகளை ஏற்படுத்த முடியும். அது பெரிய விடயம் அல்ல, ஏற்கனவே அந்தத் திட்டத்தை அரசாங்கம் தொடங்கியுள்ளது. ஆனால் இந்த மனித வள மேம்பாடு, சிந்தனை ரீதியிலான மாற்றம் இலகுவானதல்ல. எனவே, இந்தப் பலன்களை அதிகபட்சமாகப் பயன்படுத்தி, சிறந்த கல்வியைப் பெற்று நாட்டிற்குப் பயனுள்ள பிரஜையாக மாறுமாறு உங்கள் அனைவரையும் கேட்டுக்கொள்கிறேன்.

மத்திய மாகாண ஆளுநர் விசேட வைத்தியர் ஹர்ஷ சுரங்க பெர்னாண்டோ, ஜனாதிபதியின் சிரேஷ்ட மேலதிக செயலாளரும், ஜனாதிபதி நிதியத்தின் செயலாளருமான ரோஷன் கமகே அபிவிருத்தி லொத்தர் சபையின் தலைவர்/ பிரதம நிறைவேற்று அதிகாரி எம்.ஆர்.எச். ஸ்வர்ணதிலக, தேசிய லொத்தர் சபையின் தலைவர் எம்.டி. சிரில் அந்தனி பெரேரா ஆகியோரும் இங்கு கருத்துத் தெரிவித்தனர்.

இந் நிகழ்வில் மாகாணத்தின் மக்கள் பிரதிநிதிகள், மத்திய மாகாண பிரதம செயலாளர் ஜி.எச்.எம்.ஏ. பிரேமசிங்க மற்றும் கண்டி மாவட்டச் செயலாளர் இந்திக உடவத்த உள்ளிட்ட அரச அதிகாரிகள், பாதுகாப்புப் பிரிவு பிரதானிகள் உள்ளிட்ட பலர் கலந்துகொண்டனர்.

இச் செய்தியினை ஏனையவர்களுக்கும் பகிர….👇👇