ஹம்பாந்தோட்டை சர்வதேச துறைமுகக் குழுமத்தின் அறிவித்தல்!

2025 ஆம் ஆண்டு மார்ச் மாதம் முதல் டிசம்பர் வரையிலான காலப்பகுதியிலும், நடப்பு (2026) ஆண்டின் செப்டம்பர் மாதம் வரையிலான காலப்பகுதியிலும் ஹம்பாந்தோட்டை சர்வதேச துறைமுகம் ஊடாக 167,569 வாகனங்கள் விநியோகிக்கப்பட்டுள்ளதாக ஹம்பாந்தோட்டை சர்வதேச துறைமுகக் குழுமம் (HIPG) தெரிவித்துள்ளது.

இதற்கமைய, 30,809 புதிய வாகனங்கள் மற்றும் 55,580 பயன்படுத்தப்பட்ட (Used) வாகனங்கள் அடங்கலாக மொத்தம் 86,389 வாகனங்கள் 2025 ஆம் ஆண்டு மார்ச் முதல் டிசம்பர் வரையிலான காலப்பகுதியில்விநியோகிக்கப்பட்டுள்ளன.

அத்துடன், 2026ஆம் ஆண்டின் செப்டம்பர் மாதம் வரையிலான காலப்பகுதியில் 81,180 வாகனங்கள் விநியோகிக்கப்பட்டுள்ளதுடன், அவற்றில் 25,018 புதிய வாகனங்களும் 56,162 பயன்படுத்தப்பட்ட வாகனங்களும் அடங்குகின்றன.

வாகனங்களுக்கான தேவை அதிகரித்திருந்த போதிலும், போக்குவரத்து மற்றும் விநியோகத்தில் ஏற்பட்ட பல்வேறு சவால்களுக்கு மத்தியில் இறக்குமதியாளர்களுக்குத் தேவையான முழுமையான ஆதரவை வழங்க நடவடிக்கை எடுத்ததாக ஹம்பாந்தோட்டை சர்வதேச துறைமுகக் குழுமம் சுட்டிக்காட்டியுள்ளது.

இதேவேளை, ஹம்பாந்தோட்டை சர்வதேச துறைமுகக் குழுமத்தின் உடனடிச் செயற்பாடுகள், செயல்பாட்டு நெகிழ்வுத்தன்மை மற்றும் நடைமுறைச் சாதகமான ஆதரவு ஆகியவற்றை இலங்கை வாகன இறக்குமதியாளர்கள் சங்கம் (VIASL) பாராட்டியுள்ளது.

450க்கும் மேற்பட்ட உறுப்பினர்களைப் பிரதிநிதித்துவப்படுத்தும் இச்சங்கத்தில் பெருநிறுவனங்கள் மட்டுமன்றி நுண், சிறு மற்றும் நடுத்தர அளவிலான வாகன இறக்குமதி வர்த்தகர்களும் அடங்குகின்றனர்.

வாகன இறக்குமதி கட்டுப்பாடுகள் அமுலில் இருந்த காலத்தில், நீண்டகாலமாகத் துறைமுகத்தில் வைக்கப்பட்டிருந்த வாகனங்களுக்கான தாமதக் கட்டணங்களைத் (Demurrage charges) தள்ளுபடி செய்தல் உள்ளிட்ட பல சலுகைகளை வழங்கவும் துறைமுக நிர்வாகம் நடவடிக்கை எடுத்துள்ளது.

வாகனங்களை விடுவிப்பதை இலகுபடுத்துவதற்கும், இறக்குமதியாளர்களுக்கு ஏற்படும் நிதிப் பாதிப்பைக் குறைப்பதற்குமே இந்த நடவடிக்கை எடுக்கப்பட்டதாக அந்த சங்கம் வெளியிட்டுள்ள அறிக்கையில் தெரிவிக்கப்பட்டுள்ளது.

மேலும், சமீபத்தில் வளைகுடா பிராந்தியம் (Gulf region) ஊடான வாகன மறு ஏற்றுமதிச் (Transshipment) செயல்பாடுகளில் ஏற்பட்ட தடங்கல்களால் பாதிக்கப்பட்ட வாகனங்களுக்கான சேமிப்புக் கட்டணங்களைக் கட்டுப்படுத்தும் (Storage fee caps) சிறப்புத் திட்டமும் அறிமுகப்படுத்தப்பட்டுள்ளது.

இச் செய்தியினை ஏனையவர்களுக்கும் பகிர….👇👇