நாட்டில் நிலவும் கடுமையான மழைப்பொழிவு காரணமாக மண்சரிவு, வெள்ளப் பெருக்கு மற்றும் பிற இயற்கை பேரிடர் அபாயங்கள் குறித்து மிகவும் விழிப்புடன் இருக்குமாறு தேசிய கட்டிட ஆராய்ச்சி நிறுவனம், (NBRO) பொதுமக்களை அறிவுறுத்தியுள்ளது.
குறிப்பாக, இயற்கை பேரிடர்களால் ஏற்படக்கூடிய உயிர் மற்றும் சொத்து சேதங்களைக் குறைப்பதற்கு, உத்தியோகப்பூர்வ எச்சரிக்கைகளைத் தொடர்ந்து கவனித்து, அவசர நிலைக்குத் தயாராக இருக்குமாறு அதிகாரிகள் வலியுறுத்துகின்றனர்.
இதற்காகப் பின்வரும் பாதுகாப்பு நடவடிக்கைகளைப் பின்பற்றுமாறு பொதுமக்கள் அறிவுறுத்தப்படுகிறார்கள்:
அவசரகாலப் பையை (Emergency Bag) தயார் நிலையில் வைத்திருத்தல்: அவசர காலத்தில் தேவைப்படும் மருந்துகள், முக்கியமான ஆவணங்கள், உலர் உணவுகள் மற்றும் முதலுதவிப் பொருட்கள் அடங்கிய அவசரகாலப் பையைத் தயார் நிலையில் வைத்திருத்தல்.
குடும்ப உறுப்பினர்கள் மற்றும் அண்டை வீட்டாருக்கு விழிப்புணர்வு ஏற்படுத்துதல்: பாதுகாப்பு நடவடிக்கைகள் குறித்து குடும்பத்தில் உள்ள அனைவரும் அண்டை வீட்டாரும் அறிந்திருப்பதை உறுதிசெய்தல்.
வானிலை எச்சரிக்கைகளைத் தொடர்ந்து பின்பற்றுதல்: வளிமண்டலவியல் திணைக்களம் மற்றும் அனர்த்த முகாமைத்துவ மத்திய நிலையம் வெளியிடும் அறிவிப்புகளைத் தொடர்ந்து கவனித்து வருதல்.
மண்சரிவிற்கான முன் அறிகுறிகள் குறித்து எச்சரிக்கையாக இருத்தல்: தரையில் வெடிப்புகள் ஏற்படுதல், நீர் மட்டத்தில் திடீர் மாற்றங்கள், மரங்கள் சரிதல் அல்லது சேறு கலந்த நீர் கசிவு போன்ற நிலச்சரிவிற்கான முன் அறிகுறிகள் குறித்து விழிப்புடன் இருத்தல்.
உடனடியாகப் பாதுகாப்பான இடங்களுக்குச் செல்லுதல்: ஏதேனும் அபாயகரமான சூழல் ஏற்பட்டால், சிறிதும் தாமதிக்காமல் உடனடியாகப் பாதுகாப்பான இடங்களுக்கு வெளியேறுதல்.
உங்களது மற்றும் உங்களது அன்புக்குரியவர்களின் உயிரைப் பாதுகாப்பது உங்களது பொறுப்பாகும் என்பதால், இந்தச் சீரற்ற வானிலை நிலவும் சூழலில் மிகுந்த பொறுப்புடனும் நிதானத்துடனும் செயல்படுமாறு தேசிய கட்டிட ஆராய்ச்சி நிறுவனம் மேலும் நினைவூட்டுகிறது.
இச் செய்தியினை ஏனையவர்களுக்கும் பகிர….👇👇
