இலங்கையின் வர்த்தகப் பொருட்கள் மற்றும் சேவைகள் ஆகிய இரண்டையும் உள்ளடக்கிய மொத்த ஏற்றுமதி வருமானம், கடந்த 2026 ஏப்ரல் மாதத்தில் 1,380.93 மில்லியன் அமெரிக்க டொலர்களை எட்டியுள்ளதுடன், இது 2025 ஏப்ரல் மாதத்துடன் ஒப்பிடுகையில் 6 சதவீத ஆண்டு வளர்ச்சியைப் பதிவு செய்துள்ளதாக இலங்கை ஏற்றுமதி அபிவிருத்தி சபை (EDB) தெரிவித்துள்ளது.
இலங்கை சுங்கத் திணைக்களம் வெளியிட்டுள்ள தற்காலிகத் தரவுகள் மற்றும் ரத்தினக்கல், ஆபரணங்கள் மற்றும் பெட்ரோலியப் பொருட்களுக்கான மதிப்பிடப்பட்ட புள்ளிவிவரங்களின்படி, 2026 ஏப்ரலில் வர்த்தகப் பொருட்களின் ஏற்றுமதி 9.87 சதவீதத்தால் அதிகரித்து 1,063.77 மில்லியன் அமெரிக்க டொலர்களாக உயர்ந்துள்ளது.
அதேவேளையில், 2026 ஏப்ரல் மாதத்தில் சேவைத் துறை ஏற்றுமதி மூலமான வருவாய் 317.16 மில்லியன் அமெரிக்க டொலர்களாக மதிப்பிடப்பட்டுள்ளது.
இலங்கையின் ஒட்டுமொத்த ஏற்றுமதித் திறனை முன்னெடுத்துச் செல்வதில் சேவைத் துறையின் வளர்ந்து வரும் முக்கியத்துவத்தை இது அடிக்கோடிட்டுக் காட்டுவதாக ஏற்றுமதி அபிவிருத்தி சபை குறிப்பிட்டுள்ளது.
கூட்டு அடிப்படையில், 2026 ஜனவரி முதல் ஏப்ரல் வரையிலான காலப்பகுதிக்கான மொத்த ஏற்றுமதி வருமானம் 5,784.38 மில்லியன் அமெரிக்க டொலர்களாக மதிப்பிடப்பட்டுள்ளதுடன், இது 2025 ஆம் ஆண்டின் இதே காலப்பகுதியுடன் ஒப்பிடுகையில் 4.3 சதவீத வளர்ச்சியைப் பிரதிபலிக்கிறது.
இச் செய்தியினை ஏனையவர்களுக்கும் பகிர…👇👇
